Tuesday, December 30, 2008

حجي ما عنده سالفة



خوش موضوع اليوم في الجريدة




فكرة استقبالات الحجاج والبوفيهات وتقديم الهدايا مو راضية تدش مخي كلش. والاسبوع الماضي دخلت في نقاش مع الأهل على نفس الموضوع بعد أن أقيم استقبالين في بيتنا لشخصين في العائلة.



الحج واحد من خمسة أركان في الإسلام، مثله مثل الصلاة والزكاة والصوم، اللي يصلي ما يسوون له استقبال، واللي يزكي ما يفتح بوفيه، واللي يصوم ما يعطونه هدايا!

قالوا هو احتفال بإقدام الإنسان على الحج، يعني “We’re proud of you”



إنزين مشاعر الفخر بمحلها لما يقدم شخص على شيء إكسترا، مو فرض مسلّم فيه ومتوقع منه أن يؤديه.



قالوا نتحمد له بالسلامة لأنها رحلة شاقة ومتعبة ومحفوفة بالمخاطر الصحية وغيرها.



قلت ما يخالف، أفهمها أيام قبل لما كان السفر للحج على بعارين، وأفهمها قبل سنوات قليلة عندما كانت تحدث حوادث الإنهيارات والتدافع، أما الحين، فالكل يمدح بإجراءات السعودية لتسهيل رحلة الحجاج، والكل يتباهى بالخدمات التي تقدمها الحملات، هناك حملات VIP، وتقريباً كل الحملات الكويتية تجلب معها طبيب، وغيرها من الخدمات.



يعني لم تعد الرحلة "متعبة محفوفة بالمخاطر" كما كانت بالسابق، على الأقل تم تقليل المخاطر إلى أن أصبحت شأنها شأن أي سفرة لأي مكان ... فشماله الاستقبال والبوفيه والهدايا؟


آخر شي طقت جبودهم مني وقالوا "ما عندك سالفة"



:P



قلت فعلاً في أحد ما عنده سالفة ومتأكد مو انا، لكن يالله ما نقول لا حق بوفيه وكاكاو، بس ماني شاري هدايا، بعد ماكو بونس ويايتنا عطلة.


********


مزاج اليوم



يا ماشي درب الزلق لا تامن الطيحة

10 comments:

Du3aijiah said...

والله استقبالكم كشخة
كاكاو وحركات ولوية
الحين الحريم هابين هبة
يطرشون مسجات فحواها
رجعت فلانه الفلاني من الحج واللي تبي تسلم عليها (ترى الاستقبال بالتلفون) لوووول
فكي حالج يافلانة يابنت الفلاني.. دام ماكو سيولة بالديرة والكاكاو يمكن يصير غالي استقبلي بالتلفون أوفر

يعني اللي بيصير: ألو السلام عليكم
فلانه شلونج...؟ وشلون حجتج...؟
مع السلامة
وكان الله غفورا رحيم
(وطبعا لا ننسى إن التكلفة عالمتصل)
واللي مسوية استقبال ماراح تدفع ولا بيزة
لا حق كاكاو ولا حق حلو ولا حق قهوة ولا أنواع الشاي ولا حق الموالح ولا حق الفاليه ولا حتى حق إبرة

++
أبيه حسيت جني اندمجيت حبتين..بس صج الموضوع مال الاستقبالات صاير مو خوش
++

ملاحظة: عندكم نقصة كاكاو...؟ صاير ما عندنا حجاج هالسنة ولاراح يوزعون بونسات
:)

وسلامتكم وتعيشون

Mohammad Al-Yousifi said...

ظاهرة كثرة الاستقبالات زايدة خلال السنوات الماضية و اعتقد انها راح تخف في 2009 نتيجة الأزمة الاقتصادية

الدســتور said...

مطقوق
شكلم ماخذ الدار بالعالي
:)

كل هـــبه بالكويت اييها الوقت و تروح

تذكر رنات بشار القديم و بتعرف قصدي

Bloggerista said...

قلت فعلاً في أحد ما عنده سالفة ومتأكد مو انا

لول

نشفت ريجهم و هم ما اقتنعوا :P

AL7ESIN said...

مو صج فرحانين فيهم ترى.. الناس تزور بعض علشان تضيف للحياة الاجتماعية والا مو هامتهم المناسبة اساسا
:P

أبو لطيف said...

يبيلهم فتوى

استقبال بوكاكاو يخرب الحجه

حفظك الله

Anonymous said...

حجي

قصة الكاكاو والاستقبال ليست جديدة، ولكنها كل سنة تأخذ شكل جديد، ولأن الأزمة الاقتصادية الحالية طاغية فإن الحج السنة القادمة سيكون بدون استقبالات!

Kaadi said...

لووووول
ترى انا وحدة منهم اللي سووا !! و الله مو مقتنعة !! بس عشان امي والله !! و الاوادم مشالله يدقدقون !! متى قعدنكم ؟ بنمركم !! حياكم بعد شنقول ؟؟

فبدال ما تخليييها عايمة ! تحدد يومين حق الحريم ..لأن ماينعطون ويه ! مايخلصون اذا خليتها مفتووحة !! لوول

وانا موعاحبني و متغصبة القعدة ..فاللي ما يوني يعتذرون قلت لهم من صجكم ؟ ريحتوني والله ما لي خلق رزة لوول اشكره اللي ماله خلق لاييني عااادي ما اتشره !! لوول انصدموا وتسهلت :)

Unknown said...

هي عادة كويتية بحته
مثل اللي تسوي عرس وتسافر شهر عسل

بعد شهر العسل ترجع وتسوي استقبال

يعني هي ليست عادة اسلامية

بل كويتيه

مثل اللي يروحون يشترون الشهادات العالية ولمن يرجع يسوي حفلة استقبال وعشا

ومثل غدا العرس يعني الواحد امس عرسة يروح الفندق ينام يقوم الظهر الناس ناطرته على غداء العرس

:)

DK said...

hathi il Q8 :)
3alla kl ka7ah sawena estgbal !

o yama nass gbl la ero7on il7aj zahbom a`3ra`9hom 3shan estgbalhom madree ray7en il 7aj 3shan il istgbal aw il istgbal 3shan il 7aj !

9j 7ajy o 7AAJEEYYAA ma 3ndhom salfa ;P