Wednesday, December 31, 2008

طال عمركم .. عيدوا النظر


على ذمة الجريدة اليوم

كرم؟ والا خليجي؟ ... ليش جفت منابع الإبداع؟


فكرة "كرم" طرحت قبل عامين أعتقد، ذلك بعد عدة خلافات بين الدول الأعضاء.


عمان انسحبت من الفكرة برمتها، والسعودية تقول لازم ريال لأننا احنا أقوى وأثقل وأكبر دولة في الخليج، وقطر ودها ريال على استحياء بس الظاهر يحز بخاطرها تتفق مع السعودية في أي شيء.


والإمارات تريد درهم لأنه "تراثي" ولأن اقتصادها يعد الأفضل (ذاك قبل).


ولما طلعت فكرة "دريال" .. زعلوا الكويت والبحرين وقالوا إحنا عملتنا الأقوى، لذلك لازم تكون دينار.


وبعد شد وجذب لسنوات، تخرج علينا الآن بجدية فكرتا "كرم" و"خليجي."




إنزين خليجي شلون تنقال بالإنجليزي؟ كليجي؟ (مع تغليظ اللام) ... وايد غلجة.



وكرم.


يعني احنا الخليجيين أصحاب كرم.


ليش نظهر للعالم بأن لدينا عقدة نقص وأزمة ثقة بالنفس لدرجة أننا نروج لصفاتنا بعملتنا؟




إنزين الكسور شنو نسميها؟ "حسن نية"؟


سنيكرز وبيبسي وبطاط وبوكس أبيض ... كم حسابك؟


اثنين كرم و650 حسن نية.


مليقة صح؟ ... بالضبط ... بقدر ملاقة كرم.



ناهيك عن قبح التسمية.


كرم.


Karam.


كرم واحد ... كرمين ... ثلاث كرمات ... 16 كرم.


تكفون ...!




بستاربكس شلون يقولونها؟


وان قاراميل ماقياتو اند وان هوت تشوقوليت ... توتال تو قارام سير.


سير وانت بوتل اوف ووتر سيررر؟




"دينار خليجي" يا حلوها ... مو لأني من الكويت ... بس درهم كأنها "مرهم" ومو حلوة بالإنجليزي، وريال ما ينبلع، ودريال كأنها فريال، أو درجال.



دينار خليجي ... GD ... ناعم ومرتب ورسمي.



واذا ما رضوا الجيران .. أمرنا لله .. على الأقل مادام باقي سنة تطرح مسابقة في كل الدول لاقتراح التسمية ورمز العملة وتصميم الأنواط.



اليورو خرج للنور نتيجة استفتاء عام، ويا حلو إسمه ورمزه وتصميمه.



آنا الصراحة أقترح تعيدون النظر.


*********

مزاج اليوم

.

لادعي عليك رب السما كل ما دمعت عيني

.

واقول يا دمعة وفا غيره ينسيني

.

32 comments:

Bavaud said...

والله أنا مادري جريدة الجريدة وباجي المواقع الإخبارية من وين يابوا هالخبر

لإني أذكر ان قبل سنتين او اقل مجلس التعاون شكل فريق فني خاص علشان يدرسون موضوع الإسم، و شالوا عقبها اسم كرم... فمادري ليش رجع الحين

عاد من زين الأسامي الثانية اللي طرحها الفريق

ريان، وكروة، وقنطار، و دانه، و مال... وغيرهم وايد... ولا اسم نفس الأوادم

يبا العملة دينار، والجزء منها درهم
ريـال أصلا مو كلمة عربية
شكو نسمي العملة ريـال؟

Bavaud said...

صج سؤال... اذا قرروا يسموون العملة خليجي... القندرة وانت بكرامة... تصير بجم خليجي؟

Yang said...

بيت كرم بيستانسون :)

Blog 3amty said...

يبيلنا أسم من برة المنظومة عشان لا ينحسب على أحد ولا ينكره ويستثقل الأسم ..




ممكن نقول بات خليجي

ARTFUL said...

كرم

ول ول ول

شهالاسم

;D

لا والله شربات من السانك

النور العالي said...

والله انا خايف لا نضطر نسمي العملة تومان

UmmEl3yal said...

LoooL .. Ee wallah! I was thinking about it this morning. What would they call the fractions?! Lazem "7atimi".. 3shan e9eer 3 karam o 200 7atimi !

DK said...

loooooooooooooool

karaam 3aad ?! lesh mn dowal ilsham i7na :P

wela methel ma gelt e3w`9on ilnag9 ile fehom GHA9B KAREEMEEN !!

DG << dolce and gabbana ;*

7ilo ana m3aak !


PS : fkrt il estftaa2 is realy nice bs wen elee yefham ;x

أبو لطيف said...
This comment has been removed by the author.
أبو لطيف said...

خل يسمونها

خبـــــــــال

ولا احد يزعل لانها شامله

والله المستعان

حفظك الله

الدســتور said...

تصدف أفضل الاستفتاء

Mohammad Al-Yousifi said...

واضح ان قمم دول مجلس التعاون حايشها الافلاس الفكري

رقعوها بهذه الفكرة القديمة و اللي كانت ميته بالاساس

أنا كويتي said...

إذا مصرين يسمون العملة على إسم أحد لاعبين المنتخب, فأعتقد فتحي أولى من كرم.

مثال عملي على ذلك:

- كم حسابك يا الحبيب؟؟

- 7 فتحي و750 كميل

ZooZ "3grbgr" said...

لوووووووول

جنديف والله اللي قلت عنه ملاقه موتني من الضحك

كرم

الله يطريه بالخير

كان معانا بماستريخت

حده استانس يوم ما قالوا بيختارون الاسم

اهو الافلاس الفكري عند صناع القرار بس هذي اعراضه؟؟

مو شايفين شي ثاني يعني؟؟

مو بكل شي مبينين

:")

Miznah said...

lets call it gcc: got crap currency?

انا اساسا رافضه الفكره
and I'm in denial

أبو جيج يدور نعاله said...

ليش ماحد إستشارنى بالتسمية؟


العملة الخليجية أفضل تسمية لها هى

الجمل


Camel


الجمل الخليجى


Gulf Camel = GC


و حق الكسور أو العملة المعدنية = نــاقــة


و بالتالى سيقال مثلا سحارة الكيوى سعرها أربع جمال و فوقهم ميتين و خمسين ناقة

الشى الحلو بالموضوع إنه الكل راح يكون شايل بعارين فى مخباته...



توكلوا على الله و اطلقوا الجمل الذى طال إنتظاره


و منى لكل مدون خمسين ناقة هدية راس السنة


و كل عام و أنتم بخير

bo bader said...

أصلا العملة الموحدة ليش ؟؟

الاوربيين لما أصدروا اليورو سنة ٢٠٠١ بعد أكثر من ٣٠ سنة من التعاون والتكامل والتفاهم ومن ثم جاء الاتحاد الشامل وإلغاء الحدود قبل العملة الموحدة .

شوفوا احنا وين بهالمراحل وبعدين نوحد العملة !!

Bloggerista said...

بستاربكس شلون يقولونها؟
وان قاراميل ماقياتو اند وان هوت تشوقوليت ... توتال تو قارام سير

لوول

good one!

hope said...

العمله الخليجيه سواء كانت كرم او غير كر،م هي مشروع غير واقعي من الناحيه الاقتصاديه ، فالعمله الموحده تعني سياسة اقتراض واحده و هذه صعبه فهناك دول تحتاج الي الاقتراض وهناك دول لديها فوائض ، وسياسة مصروفات واحده لمنع التضخم، وهذا امر صعب ايضا ، ، كما ان العمله الموحده تعني الغاء البنوك المركزيه الوطنيه والاعتماد علي بنك خليجي مركزي واحدا ، وهنا ابقي قابلني !!!

شرقاوي said...

لا تسأل ما الفائدة.

تردد هذا السؤال في الثمانينات عند طرح فكرة الأمن الخليجي، و ملأت الصحف الكويتية صور القوات المجحفلة و المجنزرة، ...، و ما إلى ذلك من الأوصاف.

و اللي تجرأ و سأل عن جدوى تلك الفكرة تم نعته بالرجعية و ضيق الأفق.

ثم أتي الثاني من أغسطس 1990.

الزبدة: لا تسأل ما الفائدة.
ــــــ
اجمع الحرف الأول من كل عملة خليجية:ريال، دينار، درهم
ردد
ثم ادغم حرفي الدال
ردّ

بو مبارك said...

أصلا الدرهم والدينار والريال كلها أسماء غير عربية أصيلة
الدينار والدرهم أصولها يونانية وبيزنطية

على فكرة صربيا عملتها دينار!!

والريال أصله الريال الفرنسي، وكان عملة فضية متداولة في الجزيرة العربية، وفي الكويت قبل الروبية كانت العملة الريال الفرنسي

واهو أصلا مو فرنسي أهو نمساوي، ريال يعني ملكي رويال

شفيها دينار خليجي؟ أقوى عملتين الكويت والبحرين

أنا أقترح أوقية مثل موريتانيا

أو بين درهم ودينار، على الأقل الاستخدام العربي لهم قديم حوالي 2000 سنة؟

كلش كلش، نبطل تعامل بفلوس ونرد على أيام المقايضة!!

يعني تدش ستاربكس وتقول لهم طلباتك

يقولون:-
سير يو ويل بي موكاياداه اور كي نيت؟

bof-10 said...

احنا العرب وخاصتا الخليجيين ... ولا عمرنا سوينا شي صح .... وهالمره تبونا نتفق على اسم عمله ؟؟
اممم ..جايز ينحل المجلس على هالطاري...هههههه

The Simper said...

how about the first letter from one of the current currencies.. + EEJI (comes from KHALEEJI)

Riyal - Reeji
Dinar - Deeji
Dirham - Deeji

so we get 2 on 1.. then "D" wins..

so our new name is DEEJI ;)

and for the fun and simplicity, we adjust the sound of it to become: DEEJAY ;)

VOILAAAAAAAAAAAAA!

now let's think of the fractions!

6agaaga???

madri :D

سوالف said...

انا اقترح ان يطلق على العمله إسم "جمل" يا سلام إسم عربي اصيل وما اظن إن أحد بيعارض الاسم .... الله والكسور ناقه علشان ما يزعلون القوارير .. جذي تكونون ارضيتوا جميع الاطراف ... طيعوني خوش اسم حق عملتنا اليديده ترى سنة 2010 سنتكم يا الخليجيين اقروا هالمقاله التنبؤات الروسيه عن تفكك وتقسيم الولايات المتحده في شهر يونيو أو يوليو سنة 2010
يالله يا خليجي وحدوا عملتكم وبالمره غيروا اسمكم الى الولايات المتحده الخليجيه ...
الله يستر من 2010 إن صدقت التوقعات
هذا المصدر
http://online.wsj.com/article/SB123051100709638419.html

سوالف said...

عفوا أنا مع الوزير الإصلاحي الشاب الدكتور أبو جيج في تسمية العمله الخليجيه الموحده .... بالكويتي اقتراح الدكتور الشاب جدا عجبني ... وعاش
OUR CAMEL :)
والله نخيلت وانا أدفع الجمال ... جمل ينطح جمل ... حسينو بسنا جمال بسنا ...
إي هين

Kaadi said...

كرم !!!!!!!!!!!!!!!؟؟؟؟؟؟


ليش من عبادان ؟؟ لا خطيرة لا بليز لاتقولون :(

GWannabe said...

They should call it "fils/flooos"

as for the fraction, madri.

yoyo said...

ابي وين الابداع بالتسميه ولا بس تقليد

يورو خليجي

يا سلام


ولا كرم يا حبيبي

قوم تعاونوا ما ذلوا الا احنا نتعاون غلط

حرف said...

فعلا تسمية سخيفة وتدل على جفاف نبع الإبداع

كرم ؟؟

اسم سخيف يذكرني بمحمد كرم

رهيييييبة الأغنية .. شعرفك فيها ؟

رهيب فهد الماص .. بس للأسف أنحرف وتدين

Unknown said...

GR ما تنفع يعني؟
بالعكس الا احلى من GD
بس تبي الصراحه احلى شي SR
اصلا لازم الخليج كله يوحد عملته وسموها الي تبون بس السعوديه بما انها اكبر و اقوى و احلى و اهم بتكون مثل بريطانيا ومهو لازم تغير عملتهاو تبقى مثل ما هي.
أختكم:
سعوديه لا تحبذ العنصريه

SHOOMY said...

انا اقول يسمون العمله بحسب اقوى عمله خليجيه
وبعدين ليش نوحدها؟؟
يعني بالتوحيد عملات بعض الدول بترتفع والبعض الأخر بينزل
وبصراحه .. انا ما ارضى عملة دولتي تنزل عشان خاطر عمله موحده مايندرى شلون شكلها

وحاليا الكل منشغل بأسم العمله .. باجر يقولون الرمز مالها شنو؟؟
صقر ولا سيف ولا صورة اي شيخ بالضبط؟؟
ولا لونها؟؟
تعال وبدع باللون عشان الكل يرضى
بيسوونها قوس قزح

انا اقول خلك على مينونك لا إييك اللي أين منه

Emarket said...

علا كل هالتفلسف .. ماشوف واحد فيكم شغل مخه و اقترح اقتراح مثل الاوادم !!



عندنا شح بالابداع .. و فائض اب خفة الدم

يمكن عشان جذي ما عندنا قرار !